Edewecht / Ammerland/Oldenburg De Wildenloh In Ollborg is'n lüttje, smale Straat, de Lüttje Karkenstraat. Dar stund de eerste Kark. As se boot wurd, do wull de Düvel dat nich hebben. He wull de Ollnborgers dat mal aflehrn un'n grooden Busch up de Stadt smieten. Denn kemen se dar all unner doot. Eerst bekeek he sik den Hasbrook, man de weer to groot. Denn gung he nan'n Barmsholt, man dat weer em to lüttjet. Do fund he bi Twüschenahn 'n Holt, dat weer em just to paß. Bi Dreebargen fung de an, din Busch uttorieten. De Bööm seten mit de Wuddeln all inanner. Un dat, wat he utreet, dat wurd immer breder un länger. Toleßt weer he bi Twüschenahn. Dor harr he noog. Do suus he dar mit af dör de Luft. Dat weer balkendüster. He kunn kien Hand vor Ogen sehn. Baben em weern de düsteren Wulken un ünner em dat swarde Moor. Dat huul dör de Luft, dat dar de Lüe van upwaken deen, man kien Mensch wuß, wat dar los weer. As he 'n Enn flagen harr, do kreih de witte Hahn. De Düvel lach un reep: "Witte Hahn, witt, di wiek ik kienen Schritt!" He suus wieter na Ollnborg to. Do kreih 'n roden Hahn. Do wurd din Düvel al wat anners to Moot un he reep: "Rode Haahn, rood, du maakst mi groode Noot!" Dat Suusen un Bruusen wurd luter. Dat keem van dat Struck Busch, wat em dar wegfalln de un na de Eer daalsuus. Dat is de Woold, de dar vandagen in Petersfeehn is. De Düvel weer nu al dich bi Ollnborg. He kunn de Lichter al sehn van de Hüüs. wo de Lüe noch nich to Bett weern. Do kreih de swarte Hahn. De Düvel verjoog sik nich slecht. De Hahn weer em noch'n bäten froh kamen, un he reep: "Swarde Hahn, swart, du droppst mi in't Hart!" Nu harr he kien Macht mehr. He kunn din Busch nich mehr länger drägen und leet em fallen. De suus nu dich vor Ollnborg daal in't swarde Moor. Un de Düvel suus af inne Höll. Wo dat Holt hinfulln is, dar liggt't vandagen noch. Dat is de Wildenloh. Dat groode Lock bi Twüschenahn, wo de Düvel din Busch uträten hett, dat is vull Water lopen. Dat is vandagen dat "Twüschenahner Meer". De Ollnborgers awer sind an't Läven bläven un hefft ok äre Kark kloorkrägen. Överlevert van ole Lüe Woortverklaren (Worterklärung): Strat=Straße, Kark=Kirche, Düvel=Teufel, Holt=Holz, baben=oben, Wuddeln=Wurzeln, Ogen=Augen, Wulken=Wolken, sward=schwarz, frroh=früh, upwaken=aufwachen, reep=rufen, Struck=Strauch, Eer=Erde, Woold=Wald, uträten=herausziehen. Hüüs=Häuser, läven=leben