Wat so passeert mit de Brummelbeeren.

Edewecht / Bi us to Huus Wenn in Arntmaand (August) de Sömmer so sacht to Enn geiht un in dat Buschwark all de Spinnweben hangt, denn gifft dat meist noch so'n paar dröge warme Sünnendag. Dat is denn ok de richtige Brummelbeertiet.
Us Moder reep denn woll: "Kinner plückt doch 'is för mi een Emmer voll Brummelbeeren, denn gifft dat nahstens ok moien Grießpudding mit Saft!" Ja, dat weer di wat! Grießpudding mit Brummelbeersaft! Wat Schöneres geevt dat nich för us.
Ok Brummelbeernmarmelode op warmen Stuten smeck eenfach to goot. Un denn susen wi mit den Emmer los! Wi müssen de besten Stäär in de Gegend. An'n Knick in de Wisch oder achtern Wall an Dannenbusch. De Twiege hungen vull van dicke, swarte un söte Brummelbeeren. Wi kropen twüschen un unner dat Struukwark dör, harrn Arms un Been tweikratzt van de Doorns, aver wat makte us dat!
Wi frein us ja al op de Grießpudding mit Brummelbeersaft. Nu geevt dat ja fröher noch kien so'n neemodschen "Entsafter" at hüdigendaags. Nä, Saft maken weer een langtöögsche Angelegenheit. Eerst neih Moder ut Linnen een fasten Büdel, de worr mit veer Bänner twüschen twee Stöhl fastknött. Denn kehrde se dat kakenhete Brummelbeermus in den Büdel un de Saft leep in een Schödel af. Wieldes de Saft afleep, makte Moder sik an dat Reinmaken van de Buddels. So, un nu harr se de slimmste Arbeit achter sik, meen Moder. Op eenmal gifft dat een "dägern Platsch"! Een Band van den Büdel weer afreten, un de hele Muskraam weer in de Saftschöddel fluscht.
"Och herrje, wat seeg dat ut!" Allns weer rot van de söten Brummelbeersaft! De Footbodden, de Wänn, de Möbel, eenfach  allns!
Un mittenin stun ganz verbiestert us Moder, vullpüttert bit baben hen!
Wi Kinner makten een Snuut to'n blarrn, denn de Droom van den Grießpudding mit Saft weer ja nu woll hen! Aver Moder funn gau ehr Spraak woller un sä an us:" För Brummelbeergelee reekt de Saft nu woll nich mehr, aver so veel, dat ji Saft op jo'n Pudding kriegt, schrabbt wi woll noch tohoop!"
Denn keeken wi us'n Sett an, un müssen luuthals lachen!

Överlewert

Woortverklaaren:
Twiege=Zweige; langtöögsche=langandauernde; Linnen=Leinenstoff; kakenhete=kochenheiße;
wieldeß=inzwischen; dägern=gehörigen; hele=ganze.