Ammerland

Edewecht / Ammerland Schooter's Jahn hett vertellt: In olen Tieten wurd up'n Ammerland an'n Avend vör Ostern dat Osterfüür afbrennt. Dor gung dat ok immer lustig to bett laat in de Nacht - de Lüe harrn dorbi immer vääl Pläseer! Vääle wurn dor so richtig duhn bi - se haarn sülwstgemaakten Sluck mit annern sööten Kram mit. De Jungs gungn din annern Dag los an de Stär to smulln oder maaken Sprickelfüür. De lüttjen Kinner mössen immer sore Sprickels un Tacken na't Füür slurn; de grooden Jungs halln dat Füür inne gang. Rietsticken kunn se nich ümmer to faten kriegen - un de dröffen se ok nich hebben. Aver wat de vör harrn, dat kreegen se ok kloor. Eenmal op'n Ostersönndagmorgen keemen de Jungs ut de Naberschupp woller tohop un wulln Sprickelfüür maaken. Se gungen na'n afbrennt Osterfüür van een Naber un racken de Füürköhlen in'n olen afgedankten Ätenpott. De Pott harr al'n Look oder twee in Bodden; dat maakte aver nix. De Lüttjesten mössen din Köhlenpott drägen na'n Stär achtere Wallheck, wor se nüms nich sehn schull. De grooden Kinner weern all wiet vörutlopen un wulln sore Tacken un Sprickels tohopsööken. De lüttjen Jungs weern een ganzen Enn achter bläven. De Pott weer swoor un teemlich heet un all föftig Trär mössen se em daalsetten un sik verpusten. Se mössen ok jo gau tomaaken un kunn'n sik garnich ümkieken. Mit'n mal weer de ganze Flach (Jansburr's Heide) in Brand. Dör de Löcker in din Pott weer dat Füür an de Heide kamen. Man, man, dat weer di wat! Poor Buurn keem anlopen un de grooden Jungs hebbt dat Füür woller utmaakt. De lüttjen Jungs sünd gau wechlopen - anners kregen de jo jümmers toeers wecke in'n Nack, ok wenn se dat nich dahn harrn. Woortverklaren (Worterklärung): laat=spät, Pläseer=Spaß, duhn=betrunken, Sluck= Korn/Alkohol, Stär=Stelle, Ätenpott=Eßtopf, sore=vertrocknet, Tacken=Äste, Sprickels=Reisig, sluren=schleppen, Rietsticken=Streichhölzer, afgedankten=ausgemustert, swoor=schwer, Trär=Schritte.