Gedicht över us Gröönkohl

Edewecht / Ammerland Junge, is dat upstunns een Frost!
Opa nemmt sik'n Sluck to Bost;
Oma meent, ik much woll mal
een degte Mahltiet grönen Kohl!

Ja, dat is jüst na Opa's Mütz!
Grönen Kohl mit Speck un Grüz!
Van Haken nemmt he siene Jopp,
de Mütz hätt he al op'n Kopp.

Pedd't in de Holschen op de Daal,
löppt op dat Feld un kick eerst mal.
Moi in de Reeg un Strunk bi Strunk
steiht dar de Kohl gröön un gesund.

Van Küll heel stief
de Köpp moi kruus,
so dräägt Opa den Kohl in't Huus.

Nu ward he afstrippt, sneern un ruppt
ja, Oma weet, wo een dat maakt!
Se wascht em af, mal koolt, mal heet,
denn kaakt he nahstens beter week!

Nu mit em rin'n in groten Pott!
Mit Speck un Pinkel babenop!
Een lütt Spier Semp, veel Zippeln, Solt,
to'n afrunn'n noch'n Lepel Smolt.

Mit Rippspeer, Wust un Haferngört
is't wiß een Mahltiet, at sik't höört!
nu achteran een lüttjen Sluck,
denn höögt de Tung' sik un de Buuk!

Tohopriemelt  van K. D.-B.

Woortverklaaren:
upstunns=augenblicklich, degte=kräftig, afstrippt=abstreifen, seen=schneiden, Zippeln=Zwiebeln, Rippspeer=Rippenstück, höögt=Freude.