Döntjes ut use Gemeen Ährwech (Spassiges aus unserer Gemeinde Edewecht)

Edewecht / Ammerland - Kleefeld Dat wilde Huusswien Dat weer in din Sommer 1965, wi harrn bi din Buur Engelbarts in Kleefeld een Swien köfft, un dat muß jo ok van din Veehwagen in din Swienstall umlaadt weern. Dorbi is dat passeert un dat keem so: Kuum harr Vadder de Döör van sien Veehwagen upmaakt, dor sprung de oole dösige Mutt ok all rut. Engelbart kunn blots noch ropen: - Holt dat Swien! Hoolt dat Swien!, - do weer dat ok all um de Eck in din Gaarn rin un Vadder achteran! He muß ja woll bannig Angst hebben um de moien Kartuffeln, de jo all so good weern. To Recht: Denn de Mutt leep liek up din Kartuffelacker to. Un do seet se dar ok all in un wöhl un wöhl. At se den genoog tosamentrampelt harr, sä se blots - Nöff, Nöff! - , un denn gung dat wieter. Vadder un Engelbart achteran! Un so gung dat dör de Petersilien, um din Appelboom umto, dör de Dannen bitt an de Straat. Dar leeb dat ool dumme Swien ok eenfach röver, so dat dat Auto, wat dor keem, blots noch ganz knapp afbremsen kunn. De Fahrer wull woll just utstiegen um Vadder un Engelbart antoquesen, man do weern de beiden all in din Ellernbusch verswunnen, wo de Mutt rinsuust weer. Up Mal pulter Engelbart los: - Heini!, Heini! Kumm gau! Ik heff se! Ik heff se! - He harr sik an din Steert van dat Swien fastholen, un dat suust nu liek din Graben to! At Vadder mit dat Tau keem, do weer dat all to laat. Engelbart seet mit sien feine, blankpoleerte Glatz in din Schietgraben - un dat Swien dorgegen. Wi mössen all bäten grienen, denn us -Wild- swienjäger Engelbart - maak so een gräsig böös Gesicht. -Ach! Maak di dar man nix ut, Engelbart! - sä Vadder. - Kannst ja ok mit us to Middag äten! Dat gifft vandagen Swienspootjen - Engelbart haal deep Luft un sä: - Swienspootjen!? Kirl, büst du unklook? Ik hau mi hier din ganzen Vörmiddag mit so een Düwelsmutt rum, un du wullt mi Swienspootjen andreihn! Ik verstah de Welt nich mehr! Herrjemine.Herrjemine! Vertellt van R.E.! Woortverklaren (Worterklärung): umlaadt=umladen; Kuum=knapp bzw. kaum; Mutt= Mutterschwein; bannig=gewaltig; suust=rennen; antoquesen=anmeckern; seet=saß