Wat man at Kind so beleven kann.

Edewecht / In Ärwech As de jüngste "Spross" van mien Grootöllern, mien Unkel Hans,  1951 ut de Kriegsgefangenschop laat na Huus henkeem, leet he foorts siene junge Bruut ut de Stadt Berlin anreisen. Se hebbt glieks freet un noch de eerste Tiet bi mien Grootöllern wahnt.
Se weer woll tein Jahr öller as ik, so bi 22 Jahr, un weer een nette Deern, wi harrn se all geern. Aver lehrn möös se noch veel, dat stunn bi mien Opa foorts fast.
Kien Wort plattdüütsch kunn se snacken or verstahn. Een "Drahtesel" harr se ok noch nie sehn, glööv ik. Darüm möös se elkeen Weg in't Dörp to Foot belopen. Een Bus or sowat geev damals noch nich up'n Land, un Peerd un Wagen harr mien Opa nich.
"De Lex van dat Radfahrn mööt ehr woll mal geven", meen Opa to mi.
Dat Radfahrn wull se ok to geern lehrn un ehrn Keerl damit överraschen. "Na, denn man to!"
Opa harrn Rad, dar steeg man mit een Foot achtern op een lüttje Stang un denn mit'n Swupp jump man up den Sadel rupp.
Ik möös ehr dat vörmaken.
"Nä, nä!" Dat sehg ja reinweg waghalsig ut, dat weer ehr to stuur. "Aver Omas Rad, dat sehg fründlich ut", meen se.
Dat Rad harr'n feinen lieken "Gesundheitslenker", weer mit Freeloop ohne Rücktritt, harr aver'n gode Handbrems. Aver so'n Rad is een hellsch asiget Dings, wenn een sik dar nich mit utkennt, Ik möös woller op de Daal paar Runden vörföhrn.
För mi weer dat ja'n Klacks! Ik pedd to, dat Rad dreiht sik ja balb van alleen. Ik legg dat eene Been op de Lenkstang, un pedd't mit dat anner eenfach wieter, denn hüpp ik mit een Swung van Sadel af un stah op de Eer.
"Oh, dat sehg eenfach ut!" Dat troo mien Tante Gerda sik uk to - meen se.
Nu lepen wi dree mit dat Rad op de Straat. Mien Opa gifft ehr noch Bescheed. "Immer schön geradeaus gucken, immer treten, es ist etwas abschüssig und geht ganz leicht!" Se sitt op! Wi geevt ehr noch so'n lüttjen fründlichen Slag op ehre Schuller un denn geiht dat af!
Man gung dat goot! Bold to goot! Opa knippöögt mi to un grient.
"Paß op! Glieks kummt de Bääk!" Opa luurt al. Un denn is dat Malöör klaar! Torööch pedden gung ja nich, de Brems funn se nich un afhüppen van't Rad troo se sik nich! Ja, dar weer nix to maken!
Dat leep sienen Gang! Un se suust koppöver, fohrwarkt mit de Hannen dör de Luft un denn man rin in in den Sloot.
"Dat hebb ik kamen sehn," sä Opa, fummel unglöövsch an sien Mütz, dreih sik gau üm un gung in't Huus. Nahstens meen he nahdenkern, "wi Landslüüd krijoolt ja al van Geburt an mit so'n Ding! Dat harr ik nu nich dacht, dat so'n Stadtminsch dat Radfahrn nich begriepen kann!"

Överlevert

Woortverklaaren:
or=oder; freet=geheiratet; Drahtesel=Fahrrad;
Lex=Lektion; hüpp=hüpfen; hellsch= höllnisch; asig=widerwärtig;  knippöögt=zwinkern; Bääk=Bach; fohrwarkt=arbeitet; unglöövsch=ungläubig; karjoolt=u.a. schnell fahren.