Mit "Ammerländer Plattfööt" in den Bottekoken.

Edewecht / Jeddeloh Richtigen Koken kregen wi in us Kinnertiet blot an grode Festdaag to smecken. Dat geev woll mal Klaben or Zuckertwieback, aver meistiets Swatbroot. Un wenn Mudder denn mal beten Mehl kregen harr, denn backte se ut 100 Gramm Mehl, Griebensmolt un hackte Bookeckern een ganz lüttjen Koken un den schickte se na usen Vadder na Rußland.
Vadder weer in 't Jahr 1949 noch in Rußland at Soldat in'e Gefangenschupp.
Wi lickten denn mit Vergnögen de Röhrschöddel ut, dat weer ja ok all wat.
Aver dat wi doch mal een schönet grodet Stück Botterkoken to smecken kregen, keem so:
Mien Mudder föhr mit dat Rad van de Arbeit ut noch eben bi den Bäcker bilangs um Broot to halen.
He seggt to ehr: "Kumm man eben mit in de Backstuv, ik mutt dat Broot noch snieden!"
As de Maschien löpp, staht se beide dar un vertelt sik noch över so dit un dat. Dorbi trappelt mien Mudder mal so van een Been op dat anner. Un ehder de Bäcker wat seggen kann, is se al trögels pedd't in de grode Plaat mit Botterkoken, de op den Footbodden stunn to'n afköhlen.
Mien Mudder verjagt sik ja bannig, un weet nich wat se doon schall. Aver Bäcker Indorf lacht, dat em de Tranen man över de Backen rullt.
Se will em den Koken ja ok geern betahlen. Dar winkt he aver af un seggt: "De Koken is för een grode Buurnhög, ik snier em glieks in lüttje Stücken un Mehl, Fett un Zucker hett de Buur sülvst tostüürt. Dat fallt wieter nich op, wenn dar een Enn van fählt!"
Denn haalt he dat lange Kokenmeß un snitt ut den Platenkoken Mudder ehr Footspoor, un noch een deegt Stück mehr rut. "So! Ik glööv, dat köönt dien Kinner woll noch äten!"
"Un of se dat köönt!" freu sik mien Mudder un bedank sik veelmals.
Ja, un so äten wi us den Abend an leckeren Hochtietsbotterkoken satt. Aver wat weer dat noch för'n Glück, dat us Mudder so schöne grode "Ammerländer Plattfööt" harr!

Överlevert

Woortverklaaren:
Mudder=Mutter; Griebensmolt=Rückstände der Flomen bei der Schmalzgewinnung; Bookeckern=Buchkeckern - essbar; Plaat=Platte (Kuchenblech); deegt=großzügig.