Wat man ut ''n Swien alles maken kann!

Edewecht / Ammerland Is dat buten bannig koolt
un de Wind weiht dör dat Holt,
denn is dat woller mal so wiet
mit de grote Slachttetiet.

Dat Swien is dick, un fett un rund
un wegt woll 300 Pund.
Fröh an Morrn, so Klock söben
dot sik al de Hannen rögen.

Vadder, Mudder, Tant' un Knecht
leggt in de Köken allns trecht.
Pött un Pann un grode Lepel
för dat kakte Fleesch in Ketel.

Scharpe Mess' un Scheer un Band
un Gewürz ut frömde Land,
Glös un Dösen, Peper Solt
un de Zippeln för dat Smolt. 

Veel heet Water mut dar nu her
nahstens gifft dat Fett un Smeer.
De Fleeschwulf ward an Disch fastdreiht
un mal probeert, of he noch geiht.

Dat Swien is slacht! Da Blot ward röhrt,
un alles wat dar noch to höört.
de Slachter snitt nu up den Buuk
un haalt dat Binnenleven rut.

Dat Swien hangt an de Ledder an,
dat nu dat Fleesch utköhlen kann.
De Navers klaut noch gau den Steert
is sachs sien Buddel Sluck woll weert!

Dat Swien ward tweisnäden, saagt un hackt
de Bradens in de Gläser packt.
Ut Ohren, Poten un de Snuut
kaakt moie lecker Sülze rut.

De Tung', de Lebber un de Kopp
mööt't eerst in groten Ketel kaaken,
denn ward dar Lebberwurst ut maakt.

Twee dicke Schinken kaamt in Solt
un ut de Flomen braadt dat Smolt.
Dör de grote Wurstmaschien
dreiht dat Fleesch sik grov un fien.

Darut ward de Mettwust maakt,
dat is gar keen lichte Saak!
In dat Mett kummt Solt un Peper
un Gewürz, denn smeckt dat nahst beter.

Allns ward denn mit de Hann'
quetscht un drückt so goot'n dat kann.
Denn ward smeckt un pröövt un lickt,
at sik dat nu mal so schickt!

Dat Mett is fien, de Wust ward goot!
Den lesten Smack gifft noch de Rook.
Arbeiden den ganzen Dag
gifft ja nu mal Döst un Schmacht!

Ok de Sluck draff dar nich fehlen
för de utgedrögten Kehlen.
In de Pann braadt Wust un Hack
un een grotet Stück van Nack'.

Oh, dat smeckt, dat is ja klaar
hüüt mal woller wunnerbar!

Överlevert

Woortverklaaren:
Zippeln=Zwiebeln, Bradens=Braten, Flomen=Nierenfett, lickt=lecken, Döst=Durst, Smacht=Hunger.