Ligusterhagen, Schaap scheern un Opa mit dorto!

Edewecht / Ammerland As mien Grootmudder mien Grootvadder klarmakt, "vandagen läßt du di avers noch bi'n Barbeer dat Haar afnehmen", dar weer dat gar nich na Opa sien Mütz!
He harr sik ja för us beiden al veel wat beter's "to'n arbeiden" utdacht.
Verleden Jahr harr he wegen de Höhner um Omas Kruutgaarn een lüttje Ligusterhagen anplant, un de wulln wi vandagen besniern. Un foorts gung dat darbi togang!
Opa kreeg sik de grote Hagenscheer her un ik kreeg Omas Köökenscheer in de Hand drückt. Nu snippen un sneden wi beiden as dull an de lüttjen Twiege un weern hellsch vergnöögt
darbi. Un wiel dat man so flutschen de meen Opa: "West wat! Glieks scheert wi ok noch dat Schaap un sien Wull! Ok dat mööt een Jung lehrn", meen he.
Ik weer ja ok foorts Füür un Flamm! Nahdem wi dat Grööntüüch van de Hagen op din Messfaalt smeten harrn, snapp Opa sik so in vörbigahn - ut de Schüür een Tauenn un denn lepen wi op de Wisch. Opa knött dat Schaap de Been tohoop un denn kunn dat Scheren losgahn. He mit de groote Wullscher, un ik mit Omas Köökenscheer.
Ganz behott snibbeln wi de Wull um dat Schaap herüm af. Dat sehg ja man beten zachelig ut, aver eendoont, dat waßt ja woller dicht! Op mal schütt Opa wat heel snaaksch dör sien Kopp.
"Jung", seggt he, "dat scheren van de Hagen un dat Schaap weer so to seggen dien "Generalprov". Du kannst dat Snibbeln so goot, nahstens schaßt du bi mi ok noch dat Haar afnehmen, denn is dat een Afbacken!"
As ik aver to bedenken geev, dat ik mit mien teihn Jahr sowat noch nie nich doon har, sloog he dat in din Wind. "Hest ja hört!"
Oma will, de Haar mööt af grien he. Un denn seet he in de Middagsstunn still op din Stuhl in de Köök mit een Latzschört um din Hals. Ik har woller Omas Kökenscheer in de Hand un troo mi nich so rech antofangen. "Nu man to! Wees man nich bang!"
Ja, denn helpt dat ja nix! Ganz sachte snier ik an't Haar ünnerlangs, immer'n beten mehr af, bit dat so'n richtigen moien Rundschnitt worrn weer. Un denn möß ik mit een richtige Haarsniermaschien deep in sien Nacken ansetten, un sinnig na baben weg, dat Haar afscheern. Mi weer bannig flau in de Maag! Dat sehg ja jüst so zachelig ut at bi dat Schaap!
Oma schull egalweg, "ji sünd woll narrsch worrn! Immer blots dummet Tüüch in'n Kopp!"
Opa grien ehr vergnöögt an un sä: "Du häst doch seggt: De Haar möt af! Un dat beten Schewe waßt doch bold woller dicht!"

Överlevert

Woortverklaaren:
Een Afbacken=mehrere  Sachen nacheinander erledigen; Barbeer=Friseur; verleden=vergangen; Kruutgaarn=Kräuter-garten; Schaap=Schaf; Messfaalt=Miesthaufen auf dem Hof; Schüür=Scheune; zachelig=zackenhaft; snaaksch=u.a. merkwürdig; Moog=Magen